Reperi i njohur nga Shqipëria, Stresi, është mjaft aktiv dhe i ndjekur në rrjetet sociale.
Ai së fundmi ka treguar se nuk ka mundur të komunikojë me ndjekësit e tij me mesazhe dhe për këtë ka zbuluar edhe arsyen.
Me anë të një videoje të publikuar në InstaStory, është shprehur se Instagrami i është bllokuar nga Ambasada e Amerikës në Shqipëri dhe se do të zhbllokohet me datën 12 qershor.
“Juve që më keni shkruar në Instagram, është e pamundur tu kthej përgjigje se ma kanë bllokuar deri me datë 12. Ambasada Amerikane e Shqipërisë më ka bërë report për zonjën Kimete, Kim, nuk është problem. Ju kërkoj ndjesë, deri me datë 12.06 nuk mundem që t’iu përgjigjem”, ka thënë ai.
Arkimed Lushaj (emri i vërtetë) mes tjerash shton se ka përfunduar disa klipe dhe se pritet të publikohen së shpejti.
Reperi i njohur prej disa muajsh ka qëndruar në Londër, teksa pak javë më parë solli projektin e fundit “Feel Good” në bashkëpunim me artistin Cbiz.
Kënga për pak kohë ka kaluar shifrën e një milion klikimeve në YouTube. /Telegrafi/
