Forma e shkëlqyer e Folarin Balogun vazhdoi edhe të dielën, pasi i huazuari i Arsenalit gjeti sërish rrjetën.
21-vjeçari është talenti i fundit që ka dalë nga akademia “Hale End” dhe i riu i radhës që bën emrin e tij larg “Emirates”. Sezonin e kaluar ishte radha e William Saliba që të shpërthente në huazim, duke fituar çmimin e Lojtarit më të mirë të ri të sezonit në Ligue 1 gjatë kohës së tij te Marseille.
Francezi që atëherë është rikthyer në Londër dhe është vendosur shpejt si një lojtar kyç në një ekip të Arsenalit që e gjen veten në krye të tabelës në Ligën Premier.
Balogun, i cili nënshkroi një marrëveshje të re afatgjatë me Topçinjtë vitin e kaluar, u dërgua në huazim te Reims, me trajnerin Mikel Arteta që shpresonte ta shihte sulmuesin e ri të gatshëm të launte në elitën e futbollit anglez. “Para se të largohesha (në huazim), Mikel tha se donte që unë të zhvillohesha edhe më shumë si lojtar. Ishte si një përgjigje e hapur dhe për mua të interpretoja atë që ai do të thoshte me zhvillimin si lojtar i pjekur”, ka deklaruar talenti i Arsenalit.
“Por, duke u larguar jashtë vendit, unë kam filluar të mësoj se çfarë donte të thoshte. Kjo nuk do të thotë vetëm në fushë, por edhe jashtë fushës. Unë mendoj se deri në kohën që të kthehem do të jem në një vend më të mirë për të konkurruar sesa isha para se të largohesha”.
Dhe ky plan po funksionon në përsosmëri me Balogun që shfaqet si një nga talentët e rinj më emocionues në futbollin evropian. Në vetëm 12 ndeshje në Ligue 1, ai ka shtatë gola, të fundit që e shënoi në fitoren ndaj Auxerre.
Sulmuesi i ri shënon gol mesatarisht në 124 minuta, një rekord që është më i mirë se ai i superyllit të Paris Saint-Germain, Lionel Messit. Argjentinasi po shijon një sezon dukshëm më të mirë në “Parc des Princes”, pasi ka pasur vështirësi pas lëvizjes së tij të suksesshme nga Barcelona në verën e vitit 2021.
Mirëpo, rekordi i tij prej gjashtë golave mesatarisht në çdo 161 minuta është më pak se sensacioni i Arsenalit. Tifozët e Messit do të shfaqin nëntë asistimet e tij marramendëse dhe kontributin e tij të gjithanshëm, por fakti që Balogun është edhe në listën e krahasimeve – është mjaft mbresëlënës.
Forma e tij ka ngjallur natyrshëm emocione se ai mund të jetë një kontribues i rregullt në skuadrën e të rinjve të Artetas sezonin e ardhshëm dhe vetë Balogun e ka pranuar se këtu e sheh të ardhmen e tij.
“Arsenali është familja ime. Për mua, klubi përfaqëson vëllazërinë dhe bashkimin. Atje mësova të shtyj gjithmonë drejt limiteve të mija”, deklaroi ai për L’Equipe.
“Nga stërvitja më kujtohet dëshira e përhershme për të përparuar në nivel teknik. Për shembull, ne duhej të kontrollonim topin për 45 minuta pa e lënë atë të prekte tokën. E kam praktikuar edhe këtë mëngjes në stërvitje”.
“Thierry Henry, legjenda, që nganjëherë na stërviste, na mësoi se cilësia teknike ishte baza për gjithçka. Sa më shumë (cilësi) të kemi, aq më shumë kohë kemi për të vendosur se çfarë të bëjmë me topin dhe të shohim gjërat para të tjerëve”, vazhdoi ai.
Dhe Henry është një tjetër që po vëzhgon nga afër rritjen e tij. Golashënuesi rekord i Arsenalit lavdëroi Balogun për daljen nga zona e tij e rehatisë dhe beson se kjo ka ndihmuar në shtimin e cilësive të tij. /Telegrafi/
