Festim Isufi është dizajneri i parë shqiptar që prezantoi koleksionin e tij prej 20 veshjeve ‘haute couture’ në Javën e Modës në Paris, në “Ritz Paris”, në shtëpinë e Coco Chanel, ku kanë prezantuar koleksionet e tyre dizajnerët më të famshëm botërorë.
Frymëzuar nga perëndimi i diellit, Festimi solli ngjyrat e bukura të qiellit në koleksionin e tij të punuar e qëndisur me dorë me pasion e dashuri, në copa të veçanta e në modele unike, që fascionuan të ftuarit e mbrëmjen e 29 shkurtit në zemër të Parisit.
Sfilata u përmbyll me fustanin magjepsës të nusërisë nën tingujt e këngës “Baresha” në kujtim të ikonës së muzikës sonë Nexhmije Pagarusha, këngë kjo që emocionoi dhe çoi në këmbë të gjithë të pranishmit e huaj dhe shqiptar.
Përveç fashionistëve te huaj, ne sfilatën e Festim Isufit ishte edhe Armina Mevlani, Agnesa Vuthaj dhe Orinda Huta, e cila ka përgatitur një edicion special për “Jo Vetem Mode” për prezantimin e dizajnerit të parë shqiptar në javën e modës në Paris!
Për të përkrahur këtë ngjarje të rëndësishme i pranishëm ishte edhe Ambasadori i Kosovës në Francë, Z.Qëndrim Gashi dhe Znj.Jeta Abazi Gashi.
Mediat e huaja ishin te impresionuar nga dizajneri i ri me një talent të jashtëzakonshëm, i cili me koleksionin e tij solli edhe një herë Kosovën në qendër të mediave të huaja, duke promovuar artin kosovar ndërkombëtarisht! /Telegrafi/
