Esperanza dhe Teodula janë pjesë e 300 mijë grave të sterilizuara, pa pëlqimin e tyre. Së bashku me shumë gra tjera të goditura nga ky krim, me aktivistë dhe me artistë të shumtë, ato janë duke përdorur teknologjinë për të arritur tek personat që jetojnë në komunitetet e izoluara. Për këtë u krijua Projekti Quipu – një linë telefonike ku gratë tregojnë përjetimet me fjalët e tyre, ku dëgjohen nga viktimat tjera dhe ku zëri i protestës përçohet në tërë vendin, transmeton Telegrafi.
Ekipi i projektit udhëton në tërë Perunë, sidomos në rajonet më të prekura nga kampanja e sterilizimit – fshatrat e varfra në Ande dhe në Amazonë.
Ky film dokumentar shfaq udhëtimet e këtyre dy fshatareve që luftojnë për drejtësi në një shoqëri të dominuar nga meshkujt.
Në Peru, gjatë presidencës së Alberto Fujimorit (nga viti 1990 deri 2000), ka ndodhur një gjenocid dhe krim kundër njerëzimit, pasi ai ka vënë në zbatim projektin e sterilizimit. Sterilizimi i detyruar u bë kryesisht ndaj autoktonëve, gjoja në kuadër të “planit të shëndetit publik” të prezantuar më 28 korrik 1995, e fatkeqësisht të financuar nga USAID-i, Fondacioni Nippon dhe më vonë UNFPA. Veprimet e tij, ku përfshiheshin edhe metodat kontraceptive, janë kundërshtuar që në fillim nga Kisha katolike dhe organizata e krishterë Opus Dei. Por, Organizata Botërore e Shëndetësisë më 1996 përshëndet “suksesin në kontrollin e natalitetit”.
Hetimi i këtij krimi bllokohet ndër vite. Ndaj, Projekti Quipu është tendenca e bashkimit të viktimave në një luftë të përbashkët për të vërtetën dhe drejtësinë. /Telegrafi/
