Komuna e Gjilanit është sqaruar lidhur me komunikatën e lëshuar më herët, ku thuhej se Këshilli Komunal për Siguri në Bashkësi (KKSB) në Gjilan, u bënë thirrje qytetarëve që të përmbahen nga daljet e panevojshme për të lejuar hapësirë për mërgimtarët.
Komuna e Gjilanit në reagimin bërë thotë se ajo ka qenë vetëm citim në mbledhje, në mënyrë që qytetarët të kenë kujdes për vetën dhe për mërgimtarët, duke shtuar se qytetarët mund të dalin sa herë të duan, transmeton Telegrafi.
“A keni dalë sot a jo? Sa për sqarim, informata e sotme ka qenë citim nga mbledhja e Këshillit Komunal për Siguri në Bashkësi (KKSB), në frymën e asaj që të kemi më shumë kujdes për veten dhe sidomos për mërgimtarët, duke ditur kontributin e tyre të jashtëzakonshëm për ne dhe meqë, përveç tjerash, rreziku nga pandemia nuk ka kaluar. Përndryshe, dilni sa të doni. Natyrisht, duke respektuar masat në fuqi”, sqaron Komuna e Gjilanit.
Ndryshe, në komunikatën e bërë më herët thuhej se “Këshilli Komunal për Siguri në Bashkësi (KKSB) e ka vlerësuar të qetë gjendjen e sigurisë në komunën e Gjilanit, ndërkohë që ka kërkuar nga qytetarët rezident që të përmbahen nga daljet pa nevojë në qytet, gjatë kohës derisa janë këtu mërgimtarët, për t`iu lënë më shumë hapësirë e mundësi atyre që t`i shijojnë pushimet në vendlindja”. /Telegrafi/
