Të paktën 39 persona kanë mbetur të vdekur dhe më shumë se 70 të tjerë janë plagosur pasi një zjarr përfshiu një spital në Korenë e Jugut.
Zjarri mendohet të ketë filluar në sallën e urgjencës në Spitalin Sejong në qytetin juglindor të Miryang rreth orës 7:30 (në orën lokale) mëngjesin e së premtes.
Rreth 200 pacientë ishin brenda ndërtesës në momentin që ra zjarri, raporton BBC. Flakët kanë përfshirë dhe një azil për të moshuarit që ndodhej ngjitur me spitalin.
Ky është zjarri më vdekjeprurës në Korenë e Jugut në pothuajse një dekadë dhe pritet që numri i viktimave të rritet pasi disa nga të plagosurit janë në gjendje kritike.
Zjarrfikësit i thanë agjencisë së lajmeve Yonhap se viktimat mendohet se kanë vdekur nga thithja e tymit, përfshirë personelin mjekësor të spitalit.
Deri tani është raportuar se një mjek dhe një infermiere janë ndër viktimat.
Zjarrfikësit kanë konfirmuar 39 viktima për BBC ndërsa policia raportoi për 41 të vdekur.
Choi Man-woo, shefi i zjarrfikëses tha për gazetarët se nuk dihet ende shkaku i zjarrit.
“Viktimat erdhën si nga spitali ashtu edhe nga azili për të moshuarit. Disa prej tyre humbën jetën rrugës për në spital”, raporton agjencia e lajmeve AFP, sipas BBC.
Choi tha se zjarri ka filluar rreth orës 7:30 në orën lokale dhe u shua pas tre orësh.
Sipas Yonhap, 94 pacientë nga azili të moshuarve janë evakuuar në mënyrë të sigurt nga ndërtesa.
