Përfaqësuesit e organizatës Advantage Austria, Mag Wilhelm Nest dhe Avdyl Çetaj, vizituan Spitalin e Përgjithshëm në Pejë, ku u njohën nga afër me shërbimet shëndetësore, përkushtimin ndaj pacientëve dhe sfidat e institucionit.
Sipas një njoftimi të bërë nga Spitali i Pejës në Facebook, përfaqësuesit e Advantage Austria shprehën gatishmërinë e tyre për të mbështetur Spitalin përmes donacioneve, të cilat synojnë përmirësimin e shërbimeve dhe infrastrukturës shëndetësore.
“Falënderojmë Advantage Austria për këtë iniciativë të jashtëzakonshme dhe për vlerësimin e punës që stafi ynë realizon çdo ditë për të përmirësuar shëndetin”, thuhet në njoftim.
Ky bashkëpunim pritet të ndikojë pozitivisht në cilësinë e kujdesit shëndetësor në rajonin e Pejës. /Telegrafi/
