Qeveria spanjolle ka rishikuar të dhënat për viktimat e pandemisë së coronavirusit në një nga vendet më të prekura në botë dhe i zvogëloi ato në 26.834 vdekje, ose 1.918 më pak sesa të dielën.
“Sistemi i ri i gjurmimit lejon shmangien e numërimit të dyfishtë të rasteve, vlefshmërinë e të dhënave të lidhura me coronavirusin dhe eliminimin e vdekjeve që i atribuohen gabimisht COVID-19”, shpjegoi drejtori i Shërbimeve të Urgjencës, Fernando Simon.
Të dielën, Spanja njoftoi se gjithsej 28.752 njerëz kishin vdekur.
“Dallimi i 1900 personave është i madh, ne po mundohemi ta kontrollojmë, këto janë të dhënat që janë në dispozicion për ne”, shtoi Simon.
Ministria rishikoi gjithashtu numrin e rasteve të konfirmuara të infeksionit, por ndryshimi është shumë më i vogël se numri i vdekjeve.
“Kjo ndodh gjatë të gjitha epidemive kur për shkak të zhvillimeve kemi shumë pak kohë për të kontrolluar të dhënat”, shpjegoi Simon. /KP/Telegrafi/