Në të gjitha shkollat fillore dhe të mesme sot ka filluar greva dy orëshe në shenjë pakënaqësie ndaj mos përmbushjes së kontratës kolektive nga ana e Qeverisë së Kosovës.
Sipas SBASHK-ut për të parë nga afër se si po rrjedh greva nëpër komunat e Kosovës dhe për të bashkëbiseduar me arsimtarët grevistë, Këshilli Grevist Qendror gjatë së enjtes do të vizitojë disa nga shkollat fillore dhe të mesme.
Kryetari i SBASHK-ut, Rrahman Jasharaj, në orën 8 ka qëndruar në shkollën fillore “Selman Riza” në Fushë Kosovë.
Ndërsa në orën 8:50 do të vizitojë shkollën fillore “Nazim Gafurri” në Prishtinë.
Sipas komunikatës pjesa tjetër e Këshillit Qendror Grevist do të jetë në lëvizje nëpër shkollat e komunave të Kosovës.
Kjo është hera e dytë që në arsim bëhet një grevë e tillë. Më 14 janar ora e parë e dy ndërrimeve është bojkotuar nga pothuajse të gjitha shkollat e Kosovës.
SBASHK-u ka paralajmëruar edhe hapa tjerë sindikalë nëse nuk plotësohet kërkesa e tyre për zbatimin e Kontratës Kolektive. /Telegrafi/