Katër shtetasit e Kosovës që janë evakuuar nga Afganistani pritet të arrijnë sonte në Kosovë.
Kthimin e tyre në Kosovë e ka mundësuar Ministria e Punëve të Jashtme dhe Diasporës, kurse Telegrafi mëson se ata do të arrijnë në Kosovë në orët e mbrëmjes.
Më herët, Ministria e Punëve të Jashtme dhe Diasporës, kishte bërë të ditur se katër shtetasit e Kosovës me të cilët ka qenë në kontakt të drejtpërdrejt dhe ju është ofruar ndihmë pas përshkallëzimit të situatës në Afganistan, janë evakuuar.
Në njoftimin për media thuhet se që nga përshkallëzimi i situatës atje, MPJD-ja ka qenë e angazhuar për të identifikuar dhe ndihmuar shtetasit e Kosovës me qëllim të largimit sa më të shpejt nga Afganistani.
Ndryshe, kryeministri i Kosovës, Albin Kurti, ka njoftuar se Kosova do të pranojë refugjatë nga Afganistani, dhe se procedurat për strehimin e tyre kanë filluar para një muaji.
“Qytetarët kudo në botë jo vetëm që e meritojnë por edhe iu takon demokracia, liritë dhe të drejtat, dhe ne shpresojmë dhe urojmë më të mirën për qytetarët e Afganistanit. Në anën tjetër, ka një muaj që Qeveria e Kosovës është në kontakt me SHBA-në, për të përgatitur në aspektin organizativ, strehimin dhe mbrojtjen e një numri refugjatëve të Afganistanit. Ne jemi shtet serioz, këtë punë e kemi bërë pa zhurmë dhe më shumë suksese, pasi çështja e tyre është e dhimbshme dhe ndjeshme e sigurisë”, deklaroi Kurti.
Afganistani është bërë kryelajm i mediave botërore, kjo për faktin se talibanët kanë marrë nën kontroll kryeqytetin – Kabulin.
E kjo bëri që shumë diplomatë dhe punonjës të ambasadave të huaja të fillojnë procesin e evakuimit, nga frika se mund ta pësojnë me jetë. /Telegrafi/