Site icon Telegrafi

Skandal në SHBA: Prindër të pasur, aktorë e sportistë, kanë paguar miliona për regjistrimin e fëmijëve të tyre në universitet prestigjioze – FBI arreston 38 persona

Imran Amiti

Felicity Huffman dhe William Macy (Foto: Getty Images/Guliver/Twitter)

Disa personalitete të njohura janë arrestuar në Los Angeles, për shkak të mashtrimeve për regjistrimet e fëmijëve në fakultetet prestigjioze amerikane, si Yale, Georgetown, Stanford dhe Universit i Kalifornisë Jugore.

Në mesin e të përfshirëve është edhe aktorja Felicity Huffman, e cila ka paguar dhjetëra mijëra dollarë në formë donacioni, në mënyrë që vajza e saj ta kalonte provimin pranues.

Sipas dokumenteve të akuzës, personi që është marrë me këtë skemë të mashtrimeve, është takuar me aktoren dhe bashkëshortin e saj, aktorin William H. Macy, në shtëpinë e çiftit në Los Angeles dhe ua ka shpjeguar se e kontrollon qendrën e testeve dhe mund ta paguajë dikë që në mënyrë të fshehtë t’i përmirësojë përgjigjet negative të vajzës së tyre.

Çifti ka pranuar dhe e ka paguar shumën e parave për këtë shërbim – bën të ditur The Guardian.

Los Angeles Times raporton se mëngjesin e të hënës, agjentët e FBI kanë shkuar në shtëpinë e yllit të “Desperate Housewives” në Los Angeles për ta arrestuar. Aktorja është liruar të mbrohet në liri, pasi ka paguar 250.000 dollarë garanci.

Krahas saj, për vepër të njëjtë e akuzuar është edhe aktorja tjetër, Lori Loughlin, si edhe prindër të tjerë të pasur, aktorë e sportistë – të cilët kanë paguar miliona për regjistrimin e fëmijëve të tyre në universitetet prestigjioze amerikane.

Huffman dhe të tjerët janë akuzuar për komplot për të kryer mashtrime që me ligjin amerikan, dënimi shkon deri në 20 vjet burg. Bashkëshorti i saj, William Macy, nuk është akuzuar, ndërsa autoritetet nuk e kanë shpjeguar arsyen.

Për të gjithë aksionin janë angazhuar 300 agjentë të FBI-së dhe IRS-së, ndërsa janë arrestuar plot 38 persona. /Telegrafi/

Exit mobile version