Telegrafi

Situatë kaotike rrugëve të Parisit, policia dhe demonstruesit përleshen – gjithçka po ndodh për shkak të ligjit të diskutueshëm

Burim Tmava

Mijëra demonstrues janë mbledhur rrugëve të Parisit, për të shprehur pakënaqësinë për shkak të brutalitetit të policisë dhe planeve për siguri politike të presidentit Emmanuel Macron, për të cilat pretendojnë se shkelin lirinë qytetare.

Policia në protesta ka përdorur gaz lotsjellës pasi që demonstruesit hodhën mjete të ndryshme piroteknike në drejtim të tyre. Madje një grup të rinjsh kanë thyer raftet dhe dyert e dyqaneve, transmeton Telegrafi.

Demonstruesit mbanin transparentë “Franca – vendi i të drejtave policore” dhe “Tërhiqni ligjin për siguri”.

“Po shkojmë kah kufizimi më i madh i lirisë, nuk ka arsyetim për diçka të tillë”, ka thënë një pjesëmarrëse e protestave.

Partia e Macron këtë javë ka bërë të ditur se do ta ndryshojë ligjin e propozuar që mëton të kufizojë shpërndarjen e fotografive dhe videove të zyrtarëve policorë, duke hasur në kundërshti të fuqishme nga opinioni publik dhe partitë opozitare.

Pakënaqësia e opinionit eskaloi në fund të nëntorit ku disa zyrtarë policorë rrahën producentin muzikor me prejardhje afrikane Mishel Zekler, e për këtë incident qytetarët mësuan pasi që në internet u publikuan pamjet e dhunës. /Telegrafi/