Dy vatra zjarri vijojnë të jenë ende aktive në Shqipëri. Bëhet fjalë për zjarrin në Dropull, i cili vijon prej ditësh, si edhe një në vendin e quajtur Agjioneri, në Bashkinë Delvinë.
Ndërkohë, 21 vatra të tjera të regjistruara gjatë 24 orëve të fundit, për fat të mirë janë arritur që të vihen në kontroll.
“Në 24 orët e fundit janë raportuar 23 vatra zjarri, nga të cilat 21 janë shuar falë punës së pandërprerë të forcave të emergjencave civile. Aktualisht, mbeten aktive vetëm dy vatra: një në vendin e quajtur Agjioneri, në bashkinë Delvinë, ku po punohet intensivisht për izolimin e plotë të zjarrit, dhe një tjetër në bashkinë Dropull, ku situata është më e qetë, por puna vijon për të shmangur çdo rrezik përhapjeje”, thuhet në njoftimin e Ministrisë së Mbrojtjes.
Në total për shuarjen e flakëve u angazhuan 464 efektivë zjarrfikës, teksa ka pasur ndihmë edhe nga fqinjët.
“Falënderojmë për angazhimin maksimal 464 efektivë zjarrfikës, dhjetëra efektivë të Forcave të Armatosura, forcat bashkiake, forcat policore, punonjësit e Administratës së Zonave të Mbrojtura dhe të shërbimit pyjor, si dhe forcat vullnetare, të cilët me mjete, ndihmuar edhe nga helikopteri Cougar dhe 2 Canadair të ofruara nga Greqia punuan me përkushtim për të shuar flakët në temperatura të papërshtatshme”, përfundon njoftimi. /Telegrafi/