Indeksi i kapitalit njerëzor (IKNJ) i Maqedonisë është më e ulët se mesatarja në rajon dhe grupit të të ardhurave. Fëmijët në Maqedoni, kur janë 18 vjeç, pritet të përfundojnë 11.2 vjet të arsimit parashkollor, fillor dhe të mesëm. Megjithatë, kur vitet e shkollimit të krahasohet sipas cilësisë së të mësuarit, ajo është e barabartë me vetëm 6.8 vjet, që do të thotë se ka një hendek tek nxënësi prej 4.4 vjetësh, këtë e tregojnë studimet më të fundit të publikuara sot nga Banka Botërore, përcjell Telegrafi Maqedoni.
Sipas studimit të IKNJ-së, tregohet se një fëmijë i lindur sot në Maqedoni do të ishte produktiv 53 për qind nga ajo çka mund të ishte, nëse do të kishte arsimim të plotë dhe nëse do të ishte me shëndet të plotë.
Në Maqedoni, Indeksi i kapitalit njerëzor është më i madh tek vajzat se tek djemtë, gjegjësisht 0.55 krahasuar me 0.52 në një shkallë prej 0 deri në 1.
“Vlera e indeksit, sidomos vlera e indikatorëve edukativë tregojnë marrjen e masave të menjëhershme. Duket se reformat e deritanishme nuk e kanë transformuar sistemin arsimor mjaftueshëm për të ndihmuar shumicën e studentëve që të arrijnë të paktën njohuritë bazë”, thotë Drejtori i Bankës Botërore në Maqedoni, Marco Mantovanelli.
Ai mendon se një analizë e hollësishme e të dhënave nga Programi i OECD për vlerësimin ndërkombëtar të studentëve (PISA) duhet të jetë hapi i parë në aktivitetet e mundshme në politikat dhe reformat publike që me të vërtetë kanë për qëllim përmirësimin e arsimit në Maqedoni.
“Është e rëndësishme që vendi edhe më tej të marr pjesë në vlerësimin ndërkombëtar nga një shkallë e gjerë për të ndjekur cilësinë e sistemit arsimor”, thekson Mantovanelli./Telegrafi/