Ministri i Mbrojtjes i Serbisë, Aleksandar Vulin, është deklaruar sot në Krushevc në lidhje me deklarimet se ushtria serbe kaloi kufirin me Kosovën, duke thënë se ishte një patrullë e njëkohshme midis ushtrisë serbe dhe KFOR-it dhe se ajo kishte një drejtim të paracaktuar dhe se nuk kishte asnjë kalim të paligjshëm.
“E vërteta e vetme është se ishte një patrullim i njëkohshëm midis Ushtrisë Serbe dhe KFOR-it dhe komandës rajonale Lindje, që do të thotë kontingjentit turk, së bashku me dy nga kontingjenti amerikan, nga ora 16.50-18.10 ka pasur një patrullë të njëkohshëm nga fshati Muhoc për në fshatin Karaçevë e Ulët, sipas një linje të paracaktuar administrative”, citohet të ketë thënë Vulin, shkruajnë mediat serbe, përcjell Telegrafi.
Sipas tij, “dihet saktësisht ku po shkonin dhe dihet paraprakisht se ku do të lëvizin”.
Siç ka vlerësuar Vulin, “përpjekjet e Prishtinës për të ‘sulmuar edhe një herë ushtrinë serbe’ dhe për të thënë që marrëveshjet ndërkombëtare nuk respektohen dhe se Beogradi po shkel në vijën administrative janë përpjekje që po ndodhin për disa ditë”.
Ai shtoi se qëllimi është përfshirja e pjesëtarëve të Forcës së Policisë së Kosovës në patrulla të njëkohshme.
“Ushtria serbe ka refuzuar disa herë, ne kemi nënshkruar një marrëveshje me KFOR-in, jo me SHPK-në”, tha Vulin, duke shtuar se Beogradi nuk njeh askënd pos KFOR-it si dikë përgjegjës për sigurinë në tërë territorin e Kosovës. /Telegrafi/