Sindikata e mbrojtjes dhe sigurisë për sot ka paralajmëruar që të shtunën do të protestojë për shkak të mos përmbushje të kërkesave tyre për rritje të pagave për 20 për qind dhe barazim të lartësisë së mëditjes me pjesëtarët e policisë, transmeton Telegrafi Maqedoni.
Në njoftimin e dërguar të Sindikatës theksohet se protesta do të mbahet para Ministrisë së mbrojtjes dhe para Qeverisë së Republikës së Maqedonisë, ndërsa nëse nuk plotësohen kërkesat e tyre do të hyjnë në grevë në institucionet të cilat i përfshin Sindikata për mbrojtje dhe siguri.
Sindikata thekson se një periudhë më të gjatë ka bërë negociata me Ministrinë për mbrojtje për përmirësimin e standardit të punësuarve, por se nuk është arritur zgjidhje.
“Si një partner social logjik kemi lënë kohë të mjaftueshme (deri më 13.05.2016) që të ulemi në tryezë negociatash dhe të gjejmë mënyrë për përmbushje të kërkesave të lartpërmendura, thuhet në njoftim duke shtuar se deri të premten nuk janë realizuar negociata me organet kompetente dhe se për këtë arsye është marrë vendimi për protestë./Telegrafi/