Në takimin e fundit të koordinimit lokal për sigurinë në Suharekë ndër çështjet kryesore të diskutuara kanë qenë siguria në shkolla dhe menaxhimi i trafikut rrugor.
Sipas njoftimit të Komunës së Suharekës me qëllim që të ulet numri i shkeljeve dhe aksidenteve, do të ketë shtim të pranisë së policisë në trafikun rrugor.
“Po ashtu, u bë apel për kujdes të shtuar nga të gjithë pjesëmarrësit në trafik, duke theksuar rëndësinë e respektimit të rregullave dhe shenjave të komunikacionit si masë thelbësore për parandalimin e aksidenteve dhe ruajtjen e jetës së qytetarëve”, thuhet në njoftim, raporton Telegrafi.
Komandanti i Stacionit Policor në Suharekë, Afrim Sylaj, ka bërë të ditur se gjatë periudhës raportuese dy javore janë regjistruar 449 gjoba për shkelje të rregullave të komunikacionit.
Paraprakisht është shpjeguar se në këtë takim janë diskutuar masat për rritjen e sigurisë publike.
Nënkryetarja e Komunës, Mihrije Suka ka vënë në pah rëndësinë e bashkëpunimit të ndërsjellë për të siguruar një mjedis më të qetë dhe më të sigurt për qytetarët, raporton Telegrafi.
Afrim Sylaj nga Policia e Kosovës ka theksuar se situata e përgjithshme është e qetë, dhe se krahas gjobave për kundërvajtjet në trafik janë lëshuar edhe 28 urdhëresa nga gjykatat. /Telegrafi/