Udhëheqësi i garave në BIBL, Kamen Toshev, dhe udhëheqësi administrativ, Mihail Genov, ka përcjellë nga afër edhe takimin e dytë ku më shumë se 2 mijë e 500 “Plisa” kishin përgatitur një atmosferë të jashtëzakonshme.
Si rrjedhojë edhe të ftuarit nga Bullgaria kanë notuar me notën 10-të organizimin e takimit. “Zyrtarët e BIBL na kanë dhënë notën 10-të për organizimin e takimit andaj dua të falënderoj Plisat për një atmosferë të mrekullueshme që krijuan atë mbrëmje duke iu treguar të gjithëve se dimë të bëjmë organizime të nivelit evropian”, ka thënë koordinatroi Florian Miftari për Zërin.
“Kemi pasur disa kritika të vogla sa u përket karrigeve dhe teshatoreve të gjyqtarëve të cilat nuk çojnë peshë pasi janë gjëra që rregullohen shumë shpejt”, ka shtuar ai. Ndërkohë sa i përket cilësisë ai ka thënë se kjo ka ende vend për përmirësim.
“Këtu ka vend për përmirësim. Kur dihet që në ligën ballkanike mund të luajmë me katër basketbollistë të huaj mendoj se kjo do të bëjë skuadrën më cilësore dhe kualitative. Sigurisht do të bëjmë investime të tjera dhe do të jemi në nivelin e skuadrave që marrin pjesë në këtë ligë”, ka shtuar Miftari. /Telegrafi/