Donald Trump dhe Hillary Clinton kanë zhvilluar një fushatë dhe përballje të ashpër, gjatë zgjedhjeve presidenciale të zhvilluara në muajin nëntor vitin, të cilin lamë pas.
Pavarësisht përballjes elektorale të prindërve të tyre, dy vajzat e kandidatëve të atëhershëm, Ivanka Trump dhe Chelsea Clinton kanë ruajtur shoqërinë e tyre.
Në një intervistë për 20/20, të enjten në mbrëmje, vajza e presidentit, Ivanka Trump, e ka quajtur Chelsea-n një mikeshë shumë të mirë. “Ajo ka qenë shoqja ime shumë kohë para se të zhvillohej fushata dhe do të mbetet e tillë edhe pas përfundimit të zgjedhjeve. Nuk kam folur me të lidhur me këtë “kapitull të ri”, por do ta bëj. Pra nuk kemi folur që pas zgjedhjeve”,- është shprehur Ivanka.
Gjatë zgjedhjeve shoqëria mes dy vajzave është krahasuar shpesh me rivalitetin mes prindërve të tyre. Gjatë një debati në përballjen e dytë të kandidatëve, vajzat ishin prezente dhe u panë tek i dhanë dorën njëra-tjetrës përzemërsisht. Njësoj si Ivanka është shprehur edhe Chelsea, që ka thënë se miqësia është gjithmonë më e rëndësishme se politika.