Projekt-buxheti i Kosovës për vitin 2009 prezantohet të jetë 15 për qind më i lartë se ai i këtij viti, por edhe nevojat ekonomike vitin e ardhshëm do të jenë më të larta.
Kryeministri Thaçi ka premtuar se në vitin 2009 do të ketë rritje të pagave për gjithë sektorin publik për 10 për qind, si dhe ngritje të pensioneve për 12 për qind.
“Këtë viti po i vejmë themelet e shtetit të Kosovës, dhe nëse viti 2008 ka qenë viti i pavarësisë së Kosovës, viti 2009 do të jetë viti i pavarësisë ekonomike të saj”, ka thënë kryeministri Thaçi, pas prezantimit në parim të këtij projekt-buxheti.
Siç është deklaruar gjatë miratimit në parim, më shumë se 100 milionë euro do të investohen në rrugë, prej tyre 53 milionë për renovimin e rrugëve të vjetra, siç janë rruga Prishtinë-Kaçanik, Prishtinë-Pejë dhe Prishtinë-Mitrovicë.
Po ashtu, sipas Qeverisë, më shumë se 30 milionë euro do të investohen për rrugë të reja, do të ndërtohen dhe rinovohen më shumë se 60 shkolla të mesme dhe fillore me një kosto prej 66 milionë €, ndërkaq do të sigurohen falas edhe barnat nga lista esenciale.
Po ashtu rreth 60 milionë të tjera do të shkojnë për Ministrinë e Forcës së Sigurisë së Kosovës, për Ministrinë e Punëve të Jashtme dhe për Shërbimin Inteligjent të Kosovës./telegrafi/