Më shumë se 2,500 emigrantë vdiqën ose u zhdukën ndërsa përpiqeshin të kalonin Mesdheun për në Evropë deri më tani në vitin 2023, tha të enjten një zyrtar i Komisionerit të Lartë të OKB-së për Refugjatët.
“Deri më 24 shtator, mbi 2,500 njerëz u llogaritën si të vdekur ose të zhdukur vetëm në vitin 2023”, i tha Këshillit të Sigurimit, Ruven Menikdiwela, drejtore e zyrës së UNHCR-së në Nju Jork.
Ky numër shënoi një rritje të madhe me mbi 1,680 emigrantë të vdekur ose të zhdukur më shumë, krahasuar me të njëjtën periudhë të vitit 2022.
“Njerëzit humbën jetën edhe në rrugët tokësore”, shtoi ajo.
Udhëtimi tokësor nga vendet e Afrikës Sub-Sahariane, nga ku vijnë shumë prej emigrantëve, në pikat e nisjes në brigjet e Tunizisë dhe Libisë “mbetet një nga më të rrezikshmit në botë”, tha Menikdiwela.
Emigrantët dhe refugjatët “rrezikojnë vdekjen dhe shkeljet e rënda të të drejtave të njeriut në çdo hap”, theksoi ajo. /Telegrafi/