Profesori universitar, Petrit Pollozhani pohon për “Lajm” se këtë vit parashikohet një rritje e butë e inflacionit që do të thotë edhe zvogëlim i standardit jetësor të qytetarëve.
“Rritja e inflacionit automatikisht do të thotë edhe rritje e çmimeve, njëkohësisht rritje edhe e interesit të bankave. Si pasojë, do të kemi edhe zvogëlim të konsumit që është një tregues negativ për ekonominë”, tha Pollozhani.
Dekani i fakultetit ekonomik të USHT-së, Pollozhani gjithashtu tregon se rritja e normës së inflacionit në disa raste do të thotë edhe zvogëlim i aktiviteteve ekonomike, siç është industria e prodhimit, tregtimit të mallrave dhe shërbimeve. Megjithatë, ai sqaron se në Maqedoni nuk duhet të frikësohemi nga ndonjë rritje e inflacionit që nuk mund të kontrollohet. “Nuk mendoj se shteti do të lejojë të ketë ndonjë rritje të pakontrolluar të inflacionit. Në këtë rast do të ketë edhe devalvim të valutës nacionale”, tha Pollozhani.
Pas krizës globale në Maqedoni, kursi i lëvizjes kishte ndryshuar dhe ajo lëvizte në drejtim të kundërt dhe në disa raste kishte edhe deflacion. Subjektet ekonomike presin se shkalla mesatare e inflacionit këtë vit do të jetë rreth 0.7 për qind. Banka Popullore e Maqedonisë ka projektuar një rritje të inflacionit në nivel vjetro prej 1 për qind.
Për vitin 2009 analistët pritnin rritje të inflacionit nga 2.2-3.4 për qind kurse ajo kishte një ngritje deri më 5.6 për qind.
Megjithatë, në teorinë ekonomike thuhet se një ngritje e inflacionit deri në numër njëshifror është pozitive pasi do të ketë zhvillim ekonomik, ndërkaq nëse arrin numër dyshifrorë, atëherë mund të jetë e pakontrollueshme. Pikërisht nga kjo teori, institucionet shtetërore konsiderojnë se duhet shikuar këtë rritje të inflacionit si aspekt pozitiv për zhvillimin ekonomik të vendit. /lajmpress/