Klinika e Radiologjisë në QKUK ka vite që ballafaqohet mungesë të aparaturës dhe listë të gjatë të pritjes në veçanti për rezonancë magnetike.
Mirëpo drejtori i kësaj klinike Bujar Gjikolli, thotë se lista e pritjes për rezonancë magnetike është reduktuar dukshëm muajt e fundit pas shtimit të orarit të punës dhe aktivizimit të ndërrimit të tret në këtë klinikë.
“Kemi aktivizuar edhe ndërrimin e tretë, ku tashmë ftojmë më shumë edhe 39 pacientë dhe u kryejmë shërbimin. Kemi arritur ta zbresim listën e pritjes nga një vjet në një muaj”, deklaroi për RTV Dukagjinin, Bujar Gjikolli.
Gjikolli, thotë se edhe prishja dhe vonesat në servisimin e pajisjeve kanë qenë një faktor ndikues për lista të gjatë të pritjes që ka vështirësuar punën në këtë repart.
“Për të kryer shërbime na nevojitet funksionimi i aparaturës. Aparatura është e njëjtë por funksionimi është më i mirë. Si rezultat i këtyre të arriturave është mirëmbajtja e aparaturës që e bëjnë operatorët ekonomik. Më herët çdo prishje ka rezultuar me ndreqjen e saj”, deklaroi më tej Bujar Gjikolli, përcjell Telegrafi.
Ndërsa, drejtori i përgjithshëm i SHSKUK-së, Basri Sejdiu thotë se është blerë edhe rezonanca e dytë magnetike, e cila pritet që shumë shpejt të funksionalizimet.
“Sa i përket pajisjeve tashmë janë blerë. Ka pas pajisje që nuk i kemi pasur dhe tashmë janë blerë. Nëse flasim për rezonancën magnetike, ka pasur vetëm një në Kosovë tash është blerë edhe e dyta…Jemi duke u funksionalizuar në të gjitha anët”, deklaroi Basri Sejdiu.
Lista e pritjes për rezonancë magnetike në QKUK në vitin e kaluar ishte më shumë se një vit. /RTV Dukagjini/Telegrafi/