Kualifikimi në kampionatin evropian padyshim që ishte një sukses i jashtëzakonshëm për Kombëtaren e Shqipërisë.
Por fitorja në evropian ndaj Rumanisë i bëri heronj lojtarët e Kombëtares të cilët morën edhe shpërblime.
Shteti shqiptar i pajisi të gjithë me pasaporta diplomatike duke i nderuar ata.
Por këto pasaporta si duket nuk vlejnë në gjithë Evropën, pasi Amir Abrashi ka zbuluar se detyrohet ta përdorë atë të Zvicrës për t’iu shmangur ndalesave.
“Më ndodh gjithmonë që duan të shohin një tjetër dokument, sa herë që paraqes pasaportën diplomatike të Shqipërisë”, ka treguar gjakovari.
Sipas tij, ka shumë punonjës në aeroporte që nuk e njohin atë, për të cilën kërkojnë dokumente shtesë për ta vërtetuar rregullsinë e saj.
“Në çdo moment, u tregoj pasaportën zvicerane për të shmangur çdo pengesë”, ka deklaruar Abrashi.
Mesfushori i Freiburgut është një prej futbollistëve që kanë dyshtetësi, konkretisht atë helvete krahas pasaportës shqiptare. /Telegrafi/