Biznesmeni i parë rus që u dënua në Shtetet e Bashkuara për shkelje të sanksioneve është kthyer në vend.
Siç raportojnë mediet ruse, Oleg Vladislavovich Nikitin, kreu më shumë se dy vjet dënim në një burg amerikan me akuzën e përpjekjes për të shmangur sanksionet kundër eksportimit të pajisjeve të avancuara të energjisë në Rusi.
Nikitin, 54-vjeç, u dënua me 28 muaj burg, pasi ishte arrestuar në mars të 2019-së.
Ai është deklaruar fajtor për komplot, për t’i shitur një turbinë energjetike të prodhuar nga SHBA për shpimin në ujërat ruse të Arktikut te një “biznes i panjohur, të kontrolluar nga Qeveria ruse”.
Sanksionet kundër Rusisë – të vendosura në përgjigje të aneksimit të Krimesë nga Moska në 2014 – ndalojnë shitjen e teknologjisë amerikane për përdorim në projektet e naftës dhe gazit në ujërat e thella të kontrolluara nga kompanitë shtetërore ruse.
Prokurorët thanë se Nikitin shpiku një skemë të ndërlikuar për blerje, një përpjekje për të transportuar turbinën në Rusi.
Ditë më parë, biznesmeni rus i lidhur me Kremlinin, Vladislav Klyushin është ekstraduar nga Zvicra në drejtim të Shteteve të Bashkuara.
Klyushin ishte arrestuar në muajin mars, pas një kërkese të autoriteteve amerikane, të cilat kërkuan zyrtarisht ekstradimin e tij.
Biznesmeni është pronar i M13, një kompani ruse që ofron monitorim të medieve, si dhe shërbime të sigurisë kibernetike. Webfaqja e saj thotë se shërbimet e saj përdoren nga Presidenca edhe Qeveria e Rusisë. /Telegrafi/