Ministri i Kulturës, Kujtim Shala, ka takuar sot një delegacion të Këshillit Organizativ për Pajtimin e Gjaqeve, të udhëhequr nga Dom Lush Gjergji, Mulla Xhevat Kryeziu dhe Riza Krasniqi, me të cilët bisedoi për procedurat rreth vendosjes së shtatores së Anton Çettës para Institutit Albanologjik.
Ministri Kujtim Shala u shpreh se figura e Anton Çettës është unike dhe si e tillë përfaqëson vlerat të jashtëzakonshme për Kosovën dhe identitetin e saj kulturor e shtetëror, vlera këto me të cilat krenohet populli i Kosovës.
Më tej ministri Shala shtoi se kjo shtatore është shenjë e vlerësimit për kontributin e tij të madh për kulturën dhe për humanizmin shqiptar.
Ndërmjet ministrit Shala dhe përfaqësuesve të Këshillit u bisedua për procedurat që po zhvillon MKRS-ja për të vendosur këtë shtatore, dhe u dakordua që sa më parë të vendoset gur-themeli.
MKRS-ja në projeksionin buxhetor sivjet ka paraparë 50 mijë euro për këtë projekt.