Aktorin shqiptar, Marko Caka, mund ta keni parë në filmin e famshëm “Fast and Furious”, por këto ditë ai po qëndron në Kosovë.
Në emisionin “Pasdite” në RTV Dukagjini, ai ka thënë se ka shumë miq në Kosovë dhe se origjinën e të parëve e ka nga Ferizaji.
“Është dita e parë që jam këtu. Më pëlqen Kosova, kam shumë miq, origjina e të parëve të mi është nga Ferizaj, që për mua janë shumë të dashur”, thotë aktori hollivudian.
Ai ka thënë se ndjehet krenar për pjesëmarrjen e tij e në filmin e famshëm “The Fast and the Furious”, krahë aktorëve më të njohur botërorë.
“E pata fatin e mirë që të jem pjesë e atij projekti gjigant. Ishte një privilegj që isha shumë afër aktorëve të mëdhenj. Edhe në ato ditë ndihej mungesa a aktorit të njohur Paul Walker. Ndihem mirë shumë sepse nuk është e lehtë të jesh pjesëmarrës një projekt si “Fast and Furious””.
Aktori ka folur edhe për ambiciet e çdo aktori për të arritur majat e Holliwood-it.
“Njerëzit nxitojnë të bëhen yje menjëherë. Por ka shumë faktorë për të arritur aty. Atë industri e ka ëndërr çdokush. Duhet të kesh qenë i lindur aty, të kesh një mbështetje, sepse shumica e kanë të prindërve aty”, është shprehur Caka, përcjell Telegrafi.
Aktori me origjinë shqiptare ka folur edhe për sfidat që aktorët e mëdhenj kalojnë në sheshet e xhirimit.
“Aktorët si Hugh Jackman, qëndrojnë në shesh xhirim minimumi 12 orë në ditë. Gjërat që ata bëjnë të lënë pa mënd”, thotë ai.
Caka ka thënë se të krijosh raporte miqësore me aktorët e mëdhenj është pothuajse e pamundur.
“ Të shkëmbesh numrat e telefonit me aktorët e mëdhenj është e pamundur. Jeta e tyre është e tillë që nuk u jep mundësi të kenë kohë të lirë për të bërë gjëra të tilla”, shprehet i sinqertë aktori i cili ka marrë pjesë në projekte të përbashkëta me aktorë shumë të mëdhenj të botës së Hollywood-it.
Atori i cili ka luajtur krah Jason Statham, Dwayne Johnson, Vin Diesel etj., shprehet se peng në jetë i ka mbetur të luaj në film me Tom Cruise.
“Kam një ëndërr që deri tani nuk kam arritur ta realizojë, të luaj në një film bashkë me Tom Cruise. E pëlqej shumë këtë aktor, dhe për mua mbetet një ëndërr, ëndrrat nuk shuhen kurrë”, përfundoi ai. /Telegrafi/
