Pavarësisht aktit normativ që detyron mbajtjen e maskës ka shumë prej atyre qytetarëve, të cilët nuk e zbatojnë këtë masë. Policia e Shtetit raporton se në 24 orë janë ndëshkuar me nga 3 mijë lekë të reja 690 qytetarë në të gjithë vendin.
Sipas policisë, nga 690 gjoba në total, 523 janë shqiptuar për mos mbajtjen e maskës në ambientet publike, ndërsa 167 të tjera janë vendosur për pasagjerë, që lëviznin në makina private dhe me mjete të transportit publik në gjithë Shqipërinë.
“Gjatë kontrolleve në ambiente të ndryshme në të gjithë vendin, shërbimet e Policisë kanë konstatuar se shumica e qytetarëve i kishin vendosur maskat mbrojtëse edhe gjatë orëve të mbrëmjes. Po gjatë kontrolleve janë evidentuar dhe ndëshkuar 523 qytetarë që nuk i kishin vendosur maskat mbrojtëse dhe për këtë arsye, secili prej tyre është ndëshkuar me masën administrative me vlerë 3.000 lekë.
Gjithashtu, nga ana e shërbimeve të Policisë Rrugore në të gjithë vendin janë konstatuar dhe ndëshkuar me masë administrative 3.000 lekë, 167 pasagjerë që janë konstatuar pa maska në automjete private (pa lidhje familjare me drejtuesin e mjetit) dhe pasagjerë pa maska mbrojtëse në mjetet e transportit publik”, njofton policia.
Ndërkohë, Policia e Shtetit thotë se janë shoqëruar edhe 10 persona të tjerë në komisariat pasi nuk kanë pranuar të tregojnë kartën e identitetit.
“Po gjatë kontrolleve janë shoqëruar në ambientet e Policisë në të gjithë vendin, 10 shtetas që nuk kanë pranuar t’i tregojnë punonjësve të Policisë dokumentin e identifikimit apo nuk e kanë pasur atë me vete, të cilët pasi kanë paraqitur dokumentin e identifikimit, janë ndëshkuar me masën administrative 3.000 lekë dhe më pas janë lënë të lirë”, sqaron policia.
Akti normativ i botuar pak ditë më parë në Fletorën Zyrtare parashikon gjobë deri në 3 mijë lekë të reja për mos mbajtjen e maskës dhe në rast se shkelja përsëritet, kjo shumë shkon në 5 mijë lekë të reja./euronews/