Duke prezantuar buxhetin për vitin 2009, Kryeministri shqiptar Sali Berisha tha se janë ruajtur të gjitha linjat programore të qeverisë.
Ai ka garantuar stabilitetet makroekonomik të vendit dhe rritje ekonomike që në 6 mujorin e parë të këtij viti, ishte dyshifrore. Natyrisht, rritja vjetore do të dalë përfundimtare në muajt e parë të vitit që vjen.
Kryeministri Berisha, duke u ndal në drejtimet kryesore të buxhetit për vitin e ardhshëm, tha se ai përqendrohet në investimet e mëdha publike, si në akset e rëndësishme rrugore. Buxheti për vitin e ardhshëm përfshinë përfundimin e autostradës Durrës-Morinë, përfundimin e autostradës Bllatë-Bulqizë, përfundimin e autostradës Korçë-Qafë Plloçë si dhe përfundimin e punimeve në rrugën Vlorë-Sarandë.
Buxheti për vitin e ardhshëm sipas kryeministrit Berisha do të përqendrohet në ndërtimin e një seri rrugësh që zbresin drejt detit, nga Bërdica deri në Ksamil, si dhe në segmente të tjera të rëndësishme si dhe në ndërtimin dhe asfaltimin e qindra e qindra kilometrave rurale.
Kryeministri Berisha ka theksuar se buxheti 2009, në masën e madhe të tij, mbetet buxhet i infrastrukturës, ku, përveç akseve të rëndësishme rrugore, përqendrohet edhe në ujësjellës, impiantet e përpunimit të ujërave të zeza, landfilld-et që janë në ndërtim nga Shkodra, në Sarandë, Korçë dhe të gjitha qarqet e vendit. /Telegrafi/