Policia e Shtetit ka njoftuar sot arrestimin e autorit të dyshuar për vendosjen e një sasie eksplozivi në hotelin që shpërtheu mëngjesin e së hënës në Sarandë.
Grupi i posaçëm hetimor, brenda disa orëve punë intensive hetimore arriti të zbardhi ngjarjen që tronditi qytetin e Sarandës, njofton policia.
Pas rreth 12 orësh u bë e mundur zbardhja e ngjarjes, identifikimi dhe ndalimi i autorit të dyshuar, shtetasit S. Ç., 36 vjeç, banues në Sarandë, për veprën penale “Shkatërrimi i pronës me eksploziv”, me pasoja të rënda materiale.
“Ky shtetas, mëngjesin e djeshëm, në lagjen nr. 1, Sarandë, dyshohet se ka vendosur një sasi lënde eksplozive në hotelin që babai i tij, shtetasi S. Ç., 63 vjeç, që e kishte në bashkëpronësi me shtetasin E. Dh.”, thuhet në njoftimin e Policisë, raporton Telegrafi Shqipëri.
Shkak i konfliktit sipas policisë është një procesi gjyqësor që kishin 63-vjeçari dhe shtetasi E. Dh. i nisur që në vitin 2002, dhe në përfundim të të cilit, pjesa më e madhe e këtij hoteli do të kalonte në pronësi të shtetasit E. Dh”.
Si pasojë e shpërthimit me eksploziv, u shkatërrua plotësisht hoteli i ndërtuar në vitin 1996 dhe gjithashtu u shkaktuan dëmtime të fasadave të objekteve të tjera në afërsi të hotelit. Nga shpërthimi nuk pati asnjë shtetas të dëmtuar.
Materialet procedurale i kaluan Prokurorisë pranë Gjykatës së Rrethit Gjyqësor Sarandë, për veprime të mëtejshme. /Telegrafi/
