Kryetari i Prishtinës, Shpend Ahmeti ka reaguar ndaj deklarimeve të Partisë Demokratike të Kosovës se Lëvizja Vetëvendosje i ka “rehatuar” 57 militantë në Ndërmarrjen Publike Banesore të Prishtinës.
Dhe ata të cilët e kanë bërë një deklarim të tillë, kreu i Prishtinës i ka quajtur edhe si “SHIK-a të vegjël”, përcjell Telegrafi.
Në këtë drejtim, siç ka shtuar ai, të tillët japin vetëm llogari tek shefi i tyre duke u shtyrë se cili shpif më shumë.
“Kadria po e shkatërron PDK-në ashtu siç gati e shkatërroi Kosovën. Për këtë të dytën e kemi ndaluar dhe do ta ndalim, e për të parën si duket nuk ka shpëtim”, ka shkruar ndër tjerash Ahmeti në Facebook.
Postimi i plotë i Shpend Ahmetit në Facebook:
Gjenerata e re e PDKse apo më mirë me e quajt gjenerata e Kadri Veselit, për dallim nga themeluesit, nuk ështe ngritur me sakrificë apo aktivizëm kombëtar por vetëm me servilizëm ndaj Kadrisë. Ky servilizëm është shpërblyer me financa e pushtet.
Keta janë gjenerata e shpifësve, mjegullkrijuesve, e portaleve të shpërndarjeve të lajmeve të rrejshme. E mira është se Kadria i nxorri gati të gjithë mbi sipërfaqe dhe tash këta duhet me tregu vetën.
Këta nuk kanë as konstituencë e as votues prandaj edhe nuk japin llogari publike por vetëm llogari te shefi ku shtyhen se cili shpifi më shumë e cili lujti me shumë lojë të flliqta. Kane qef krejt me u bo ShIKa rë vegjël.
Kadria po e shkatërron PDKnë ashtu sic gati e shkatërroi Kosovën. Për këtë të dyten e kemi ndaluar dhe do ta ndalim, e për të parën si duket nuk ka shpëtim.(sic) /Telegrafi/