Shpat Aliu javën tjetër pritet të shkarkohet nga pozita e zëvendëskryetarit të Kuvendit Komunal të Preshevës.
Ulësen e tij në këtë institucion pritet ta zë Branko Trajkoviq, që udhëheq koalicionin e partive serbe.
Vendimi tashmë është nënshkruar nga kryetari i Kuvendit Komunal të Preshevës, Sami Salihu dhe pritet të miratohet në seancën e 11 majit.
Lajmin e ka konfirmuar për Telegrafin, kryetari i Preshvës, Shqiprim Arifi.
Ai e ka arsyetuar këtë vendim duke thënë se Aliu është anëtar i kryesisë së Partisë Demokratike Shqiptare (PDSH) dhe “dora e djathtë” e Ragmi Mustafës.
“Po, do të shkarkohet javën tjetër pasi nuk kemi koalicion me PDSH-në e Ragmi Mustafës. Shpat Aliu është oponent politik si anëtar i kryesisë së PDSH-së dhe dora e djathtë e Ragmi Mustafës. Pra, do të ishte sikur në qeverinë e tanishme të Kosovës, të zgjidhet një opozitar i Lidhjes Demokratike të Kosovës si zv. kryetar i Kuvendit”, deklaroi Arifi.
Për këtë vendim që pritet të merret ka shkruar edhe aktivisti i shoqërisë civile në Preshevë, Valon Arifi, i cili është shprehur i zhgënjyer duke thënë se “nuk e kisha ndërru asnjëherë, jo për shkak të kombësisë që kanë si njëri si tjetri, por për shkak të politikës që ndjekin”.
“Shqiprim Arifi e Sami Salihu zëvendësojnë Shpat Aliun, ish ushtarin e UÇPMB-së, njëherit djalin e axhës së Liburn Aliut, nga pozita e zv.kryetarit të Kuvendit Komunal të Preshevës me drejtuesin e Partisë Përparimtare Serbe (SNS) të Aleksandar Vuqiq, Branko Trajkoviq”.
“Me Shpatin sa herë rrejmë nuk pajtohemi për shumëçka derisa me Brankon nuk pajtohem për asgjë”, ka shkruar Arifi në rrjetin social Facebook. /Telegrafi/
