Shoqata e qytetarëve me diabet në Tetovë ka alarmuar gjendjen për mungesën e insulinës në këtë qytet. Nënkryetari i Shoqatës Haqim Osmani, për “Gazetar Kronika”, tha se ka pasur edhe raste mortore, për shkak të mungesë së insulinës.
Ai tha se janë ankuar për mungesën e ilaçit për diabetin, ndërsa ende nuk kanë marrë përgjigje, duke shtuar se “faji çdo herë është jetim”.
“Gjendja është alarmante me insulinën, me aparatet për matjen e sheqerit. Kemi raste të rënda, mungon terapia e nevojshme, dëgjuam se para disa ditëve ka pasur edhe rast vdekje për shkak të mungesës së insulinës. Momentalisht në Komunën e Tetovës janë mbi 4 mijë pacientë shfrytëzues të insulinës, prej të cilëve 150 janë të varur nga insulina”.
“Në Tetovë ka mungesë të disa llojeve të insulinës. Disa janë por me sasi të vogël, një pjesë aspak nuk e kanë sjellë. Momentalisht nevojat plotësohen vetëm me një lloj insuline. Është interesante se në qytetet lindore, atje dërgohet insulina, aparate, ndërsa Tetovën e anashkalojnë edhe pse është qyteti i dytë sipas numrit të pacientëve”.
“Ka mundësi të furnizohet Tetova, ato pjesë që u teprojnë në pjesën lindore, të mund t’i sjellin në Tetovë. Këtë duhet ta bëjë ministria, por si çdo herë faji është jetim. Por ato që pësojnë më tepër janë pacientët”, tha Haqim Osmani.
Ai theksoi se si përgjigje nga Ministria e Shëndetësisë kanë marrë se deri në prill do të përfundojë ky problem./Telegrafi/
