Shoqata e bankave ka konstatuar gjithashtu, se peshën kryesore në depozita e përbëjnë kursimet e qytetarëve. Kështu, në fund të marsit, qytetarët kishin depozituar 717.4 miliardë lekë, ndërsa depozitat e bizneseve llogariten në 113.2 miliardë lekë. Normat e interesit që ofrojnë bankat për depozitat vlerësohen të jenë edhe faktori kryesor që ka nxitur qytetarët të mbyllin pararët e tyre pranë sporteleve bankare. Kjo duke pasur parasysh edhe rritjen e konkurrencës në tregun bankar vendas, ku operojnë 16 banka.
Gjatë muajve të verës pritet që niveli i depozitave të rritet sërish. Një pjesë e emigrantëve që kthehen në atdhe për pushime, preferojnë t’i mbyllin kursimet e tyre në bankat vendase. Kjo duke pasur parasysh edhe krizën që ka përfshirë Greqinë, vend ku jetojnë dhe punojnë me mijëra emigrantë shqiptarë.
Rritja e nivelit të depozitave është edhe një ndër treguesit që dëshmon për sigurinë dhe gjendjen e mirë financiare të sistemit bankar shqiptar, pasi shtimi i depozitave rrit likuiditetin e bankave dhe ndihmon këto të fundit që të japin më shumë kredi, raportoi BW./Telegrafi/