Deri në ditën e djeshme në sportelet e Bashkisë së Shkupit janë dorëzuar mbi 1300 kërkesa për subvencione për blerjen e biçikletave, që sipas bashkisë, do të thotë rritje të interesit të qytetarëve për kompensim të një pjese të harxhimeve.
Mjetet që Bashkia e Shkupit do t’i subvencionojë janë 50 për qind të vlerës së biçikletës, por jo më shumë se 3 mijë denarë për person, si dhe 50 për qind të vlerës së biçikletës së adaptuar për personat me nevoja të veçanta, por jo më shumë se 90 mijë denarë për person, përcjell Telegrafi Maqedoni.
Për subvencionimin për blerjen e biçikletave në buxhetin e Bashkisë së Shkupit janë ndarë 10 milionë denarë, prej të cilave 9 milionë janë paraparë për subvencione për biçikleta, ndërsa një milionë për subvencionim të biçikletave të adaptuara për personat me nevoja të veçanta.
Thirrja publike për subvencionim të biçikletave realizohet sipas parimit “kush vjen i pari, i pari shërbehet”./Telegrafi/