Samiti evropian i zonave të lira që prej sot mbahet në Shkup me mbi 350 pjesëmarrës, fillon me panel ministror kushtuar ndihmës shtetërore për investitorët, në të cilin do të marrin pjesë ministri i Ekonomisë, Kreshnik Bekteshi si edhe tre ministra nga vendet e rajonit.
Do të bisedohet për harmonizimin e rajonit për politikat dhe unifikimin e qëndrimeve rreth ndarjes së ndihmës shtetërore. Bashkimi Evropian kërkon harmonizim rreth ndihmës shtetërore që të mos ketë zona vartëse.
Samitin paraprakisht me fjalime përshëndetëse do ta hapin zëvendëskryeministri për Çështje Ekonomike, Koço Angjushev, drejtori i Drejtorisë për Zona Zhvillimore Teknologjike Industriale (ZZHTI), Aleksandar Mlladenovski dhe Muhamed Al Zaroni, kryetar i Organizatës Botërore të Zonave të Lira.
Gjatë samitit sot do të nënshkruhet marrëveshje për bashkëpunimin midis ZZHTI dhe Organizatës Botërore të Zonave të Lira dhe do të mbahen panele me temat “E ardhmja e zonave të lira dhe sfidat me të cilat ballafaqohen”, “Tregtia ilegale dhe efektet e saj ndaj zonave të lira dhe programet e tyre të sigurta” dhe “Formimi i shoqatës e cila do t’i përfshijë të gjitha llojet e zonave”. Nesër është paraparë vizitë në zonën e lirë ekonomike në Shkup./Telegrafi/