Temperaturat e larta në hemisferën veriore nuk kanë gjasa të ndikojnë ndjeshëm në pandeminë e coronavirusit, thonë shkencëtarët e Princeton, New Jersey.
Disa studime statistikore të kryera muajt e fundit kanë treguar një lidhje midis klimës dhe coronavirusit – sa më i lagësht dhe i ngrohtë të jetë, aq më pak ka gjasa të përhapet.
Por këto janë të dhëna paraprake dhe lidhja midis klimës dhe COVID-19 ende nuk dihet.
Një studim nga Princeton, botuar në revistën Science, nuk e përjashton këtë lidhje, por përfundon se ndikimi i klimës në përhapjen e virusit është “modest”.
“Gjetjet tona tregojnë se pa masa efektive të kontrollit, virusi do të vazhdojë të përhapet edhe në mot të ngrohtë dhe më të lagësht. Ai nuk do të frenojë ndjeshëm pandeminë”, tha studimi, transmeton Telegrafi.
“Ne parashikojmë që klima më e ngrohtë nuk do të ngadalësojë virusin në fazën e parë”, tha Rachel Baker nga Princeton.
Megjithëse ndikimet klimatike, veçanërisht lagështia, luajnë një rol në përhapjen e coronavirusit dhe gripave të tjerë, autorët thonë se në këtë rast, mungesa e imunitetit të përhapur ndaj COVID-19 është më e rëndësishme.
“Ne po vërejmë një ndikim të klimës në mbizotërimin dhe kohën e pandemisë, por në përgjithësi, virusi do të vazhdojë të përhapet sepse nuk ka imunitet të mjaftueshëm midis popullatës”, shpjegoi Baker.
Ai kujton vende të tilla si Brazili, Ekuadori apo Australia, ku moti i ngrohtë nuk pati një ndikim të madh në pandeminë.
“Pa masa kontrolli ose vaksinë, virusi do të vazhdojë të lëvizë në pjesë të mëdha të popullatës së botës dhe vetëm më vonë do të bëhet një sëmundje sezonale.
Për studimin, ata kryen disa simulime se si virusi mund të reagojë në kushte të ndryshme klimatike. Në të gjithë kushtet, klima u bë një faktor vetëm pasi një pjesë e madhe e popullsisë fitoi imunitet.
“Sa më shumë imunitet të ndërtohet në popullatë, aq më shumë do të rritet ndikimi i klimës në virus. Vetëm kështu një pandemi e madhe do të bëhet një infeksion sezonal”, tha Baker. /Telegrafi/
