Në fakt ky ishte edhe meçi kryesor i mbrëmjes së parë të turneut, që është në kalendarin e AIBA-s. Darkov është boksier me përvojë dhe fitues i dy medaljeve evropiane, por Xhoxhaj nuk tregoi aspak respekt për të dhe shënoi fitore të merituar. Rundi i parë u karakterizua me luftë të ashpër dhe goditje të shumta nga të dy boksierët. Mirëpo, në rundin e dytë Xhoxhaj hyri furishëm dhe një goditje e tij e hodhi në dysheme hungarezin, që ishte sinjal i qartë për fitoren e boksierit kosovar. Edhe në fillim të rundit të tretë Xhoxhaj e pati një seri goditjesh, pas së cilave Darkov u gjend në situatë të vështirë, ndërsa pas numërimit nga ana e gjyqatrit në ring, me vendimin e mjekut, meçi u ndërpre.
Fitore ka shënuar edhe Arian Gashi, i cili në kategorinë 69 kilogramë e mposhti bullgarin Petar Paunov. Pas rundit të parë, në të cilin nuk ishte në nivelin më të mirë, në vazhdim Gashi boksoi për mrekulli dhe fitorja i takoi me vendimin unanim të gjyqtarëve. I vetmi boksier nga Kosova që nuk e kaloi rrethin e parë ishte Naser Shala (64 kg.). Ai pëspo humbje nga armeni Gor Eridian, megjithëse në bazë të cilësive të dy boksierëve, Shala ka mundur të shmangë humbjen.
Përzgjedhësi i Përfaqësueses së Kosovës, Xhevdet Peci, është shprehur i kënaqur me atë që treguan boksierët e tij, ndërsa pret që me këtë ritëm të vazhdojnë edhe në meçet e ardhshme. Drejtësinë në këtë turne është duke e ndarë edhe gjyqtari ndërkombëtar Latif Demolli. Sot në program janë meçet gjysmëfinale, ndërsa përveç Xhoxhajt e Gashit, në ring do të paraqitet edhe Fatos Ferizi (52 kg.), i cili rrethin e parë e kaloi pa luftë. /Tribuna/Telegrafi/