Jacqui Holdsworth ka hyrë në tualetin e një restoranti në Londër, për të dalë vetëm pasi të kenë shkuar stafi i punonjësve.
Kamerat e sigurisë e kanë xhiruar atë, teksa ka përgatitur disa sandviçë, të cilat i ka ngrënë duke i shoqëruar me birrë, transmeton Telegrafi.
Pasi ka pirë një sasi të konsiderueshme, ajo është përpjekur të del përjashta, por e ka pasur të pamundur dhe e ka kërkuar ndihmën e partnerit. Ky i fundit e ka thyer xhamin e një dritareje, për ta ndihmuar atë të del nga aty, ndërsa më pas janë larguar në drejtim të panjohur.
Mësohet se ajo e ka mbushur edhe një qese për mbeturina me pije dhe ushqime, që kapin vlerën e afro 500 eurove.
“Kam fjetur në tualet dhe kur dola isha shumë e uritur, prandaj më duhet të haja diçka”, ka thënë Holdsworth lidhur me rastin. Mirëpo, më vonë ka pranuar se gjithçka e kishte menduar mirë dhe e kishte kryer me paramendim.
Për këtë arsye, asaj i janë dhënë katër muaj dënim me burg. /Telegrafi/