Gati 28 milionë produkte të falsifikuara dhe të paligjshme u konfiskuan, përfshirë 27 milionë maska, në një operacion të kryer në bashkëpunim me 21 vende evropiane përfshirë Belgjikën, raportoi Europol të premten.
Sipas mediave të huaja, përcjell Telegrafi, operacioni tetë-mujor, i njohur si “Aphrodite”, u zhvillua bashkërisht nga Guardia di Finanza italiane dhe policia kombëtare irlandeze (An Garda Síochána) me mbështetjen e Europol.
Nga dhjetori 2019 deri në korrik 2020, shërbimet monitoruan shitjet në internet të një larmie të gjerë të mallrave të falsifikuara, duke çuar në kontrolle në depo, dyqane dhe tregje në Belgjikë, Qipro, Greqi, Irlandë, Itali, Portugali, Rumani dhe Spanjë.
Operacioni çoi në “çmontimin” e 123 llogarive të rrjeteve sociale dhe 36 faqeve të internetit që shesin mallra të falsifikuara.
Përveç 27 milionë maskave të fytyrës, autoritetet sekuestruan 800,000 artikuj veshjesh, veshje sportive, këpucë, pajisje dhe lodra.
Si rezultat, dhjetë persona u arrestuan në Greqi dhe më shumë se 700,000 euro u sekuestruan gjithashtu. /Telegrafi/