Shitjet globale të Tesla-s ranë për tremujorin e dytë radhazi, pavarësisht uljeve të çmimeve dhe ofertave të financimit me interes të ulët, një tjetër shenjë e dobësimit të kërkesës për produktet e kompanisë dhe automjetet elektrike në përgjithësi.
Kompania e Austin, Teksas, tha të martën se shiti 436,956 automjete nga prilli deri në qershor, 4,8% më pak nga 466,140 të shitura në të njëjtën periudhë të një viti më parë.
Por shitjet ishin më të mira se shifra prej 436,000 që prisnin analistët, shkruajnë mediat e huaja, përcjell Telegrafi.
Kërkesa për EV në mbarë botën po ngadalësohet, por ato janë ende në rritje për shumicën e prodhuesve të automjeteve.
Dhe Tesla, me një linjë modelesh të vjetruara dhe çmime mesatare relativisht të larta të shitjes, është ballafaquar me probleme më shumë se prodhuesit e tjerë.
Megjithatë, ajo ruajti titullin e prodhuesit më të shitur të automjeteve elektrike në botë.
Për gjysmën e parë të vitit, Tesla shiti më shumë se 910,000 automjete në mbarë botën, duke mposhtur me lehtësi BYD-në e Kinës, e cila shiti 726,153.
Tesla nuk dha asnjë shpjegim për rënien e shitjeve dhe kompania do të publikojë fitimet e tremujorit të dytë më 23 korrik.
Megjithatë, rënia e shitjeve të prodhuesit të automjeteve elektrike vjen pasi konkurrenca po rritet nga prodhuesit e vjetër të automjeteve dhe ato fillestare, të cilët po përpiqen të marrin pjesën e vetë të tregut.
Rënia e shitjeve erdhi pavarësisht se Tesla uli 2000 dollarë nga çmimet e tre prej pesë modeleve të saj në SHBA në prill. Kompania uli çmimet e Model Y, modelit më të popullarizuar të Teslas dhe automjetit elektrik më të shitur në SHBA, si dhe të Modeleve X dhe S. /Telegrafi/