Me rastin e Ditës ndërkombëtare për ndërprerjen e mosndëshkimit për sulmet ndaj gazetarëve dhe punëtorëve mediatikë, Shoqata e Gazetarëve të Maqedonisë (SHGM) dhe Sindikata e pavarur dolën para Kuvendit me thirrje për miratimin e amendamenteve të Kodit penal për të mundësuar siguri më të madhe për gazetarët dhe të punësuarit e tjerë në mediat.
“Tani më shumë se kurrë, sulmi ndaj gazetarëve duhet të trajtohet si sulm ndaj personit zyrtar. Është koha që të bëhet ndonjë lëvizje në këtë drejtim. Në kushte kur gazetarët, kameramanët dhe fotoreporterët janë në rrezik të sulmeve dhe kërcënimeve për jetën e tyre, Kuvendi duhet të tregojë se siguria e gazetarëve është parakusht që ta bëjnë punën e tyre në mënyrë profesionale, e jo vetëm që ta rrisë sigurinë e tyre por edhe ta arrijë qëllimin e këtij profesioni, informimi i pandërprerë dhe me kohë të qytetarëve”, tha Mlladen Çadikovski, kryetar i SHGM-së.
“Sot mbushen pesë vjet nga fillimi i nismës për ndryshim të Kodit Penal me të cilin gazetarët dhe punëtorët mediatikë do të kishin mbrojtje më të madhe. Kjo do të thotë se sulmet ndaj tyre do të trajtoheshin nga ana e Prokurorisë dhe institucioneve shtetërore, diçka për të cilën u angazhuam para 5 vjetëve. Që nga fillimi i kësaj nisme, dëgjuam për shumë angazhime deklarative për lirinë e mediave. U munduam që përmes të gjitha formave lobimi, përmes takimeve në Qeveri dhe propozimeve konkrete të tejkalohet kjo situatë”, pohoi Pavle Bellovski, LSGM.