Çdo vit, UNESCO shpallë “Kryeqytetin e Librit në Botë”, e këtë vit çmimi prestigjioz i është dhënë Emirateve të Bashkuara Arabe më saktësisht Sharjahut.
Ky çmim i është dhuruar Emirateve të Bashkuara Arabe si një mirënjohje e udhëtimit kulturor dhe kontributet e mëdha që ka bërë në nivel lokal, rajonal dhe ndërkombëtar. Emiratet e Bashkuara Arabe janë vlerësuar si një model shembullor, bartës të një mesazhi humanitar me vullnet të mirë, paqe dhe tolerancë.
Me rastin e përzgjedhjes si fitues i çmimit “World Book Capital 2019”, autoritetet e Sharjah kanë organizuar shfaqje madhështore teatrale e muzikore, e cila do të zgjasë për pesë ditë me radhë duke filluar prej datës 23-27 Prill.
Shfaqja ‘1001 Nights: The Last Chapter’ ose “1001 Netë: Kapitulli i fundit” është frymëzuar nga epoka legjendare e botës arabe dhe antologjia e përrallave popullore “Një mijë e një netë”. Kjo shfaqje dhe aktivitete të shumta do të mbahen në amfiteatrin “Al Majaz”, një amfiteatër gjigant i inspiruar nga koloseumet legjendare romake dhe njëkohësisht i vetmi i llojit të tij në rajon.
Përgatitjet për këtë shfaqje kanë filluar pothuajse që një vit dhe deri tani artistët kanë kaluar mbi 500 orë duke u trajnuar për të sjellë në jetë këtë kryevepër teatrale, të cilën publiku do të jetë në gjendje ta dëgjojë në tre gjuhë: arabisht, anglisht dhe frëngjisht në të njëjtën kohë.
Inagurimin e shfaqjes do ta bëjë Sheiku Dr.Sulltan bin Mohamed Al Qasimi, Anëtar i Këshillit të Lartë dhe Sundimtar i Sharjahut, në praninë e diplomatëve të nivelit të lartë dhe zyrtarëve nga autoritetet arabe dhe ndërkombëtare. Gjithashtu të ftuar specialë si autorë të shquar, poetë, intelektualë dhe figura kryesore të mediave nga e gjithë bota kanë konfirmuar pjesëmarrjen e tyre në këtë ngjarje.
Sharjah do të kalojë një moment historik e të rëndësishëm kulturor, dhe pjesë e këtij momenti do të jenë edhe të ftuarit specialë nga pothuajse gjithë bota.