Një burim turk i sigurisë ka thënë se Gina Haspel, e cila vizitoi Turqinë javën e shkuar, ka të gjitha provat në lidhje me vrasjen e gazetarit Jamal Khashoggi.
Arabia Saudite ka pranuar se Jamal Khashoggi u vra në konsullatën e tij në qytetin turk të Stambollit.
Khashoggi – një shkrimtar saudit, banor i SHBA dhe kolumnist i Washington Post – hyri në ndërtesë më 2 tetor për të marrë dokumentacionin që vërtetonte se ishte ndarë me gruan e tij të mëparshme në mënyrë që të mund të martohej përsëri.
Pas javëve të mohimit të përsëritur se kishte të bënte me zhdukjen e tij, mbretëria përfundimisht pranoi se vrasja ishte e paramenduar. Vendndodhja e trupit të tij ende nuk dihet.
Ndërkohë një burim turk i sigurisë i ka thënë Al Jazeera se drejtoresha e CIA-s, Gina Haspel, ka parë të gjitha provat lidhur me vrasjen e Khashoggit.
Siç thuhet më tej, përcjell Telegrafi, provat tregojnë se operacioni është kryer me urdhër nga niveli më i lartë i udhëheqjes në Arabinë Saudite.
Bëhet e ditur se Haspel ishte në Turqi javën e kaluar për të shqyrtuar provat, përpara se të informonte Presidentin e SHBA-së, Donald Trump në Uashington, DC.
Burime turke kanë thënë gjithashtu se Arabia Saudite do të paguanin para ose kompensim për familjen e Khashoggi dhe të fejuarën e tij.
Gjithashtu mediat turke kanë raportuar se stafi në konsullatën e Arabisë Saudite në Stamboll u përpoq të çmontojë kamerat e sigurisë për të mbuluar vrasjen e Khashoggi. /Telegrafi/