Një anëtar i rangut të lartë i dyshuar i kartelit të drogës i cili ishte në arrati për katër vjet u kap më në fund, pak momente para se të vendosej për t’u martuar në një kishë në Kolumbi.
Sipas Zyrës së Prokurorit të Përgjithshëm të Kolumbisë, Luis ‘Machete’ Santana, 24 vjeç, është një nga shefat kryesorë të “Klanit të Gjirit” dhe mbikëqyr operacionet e organizatave kriminale në departamentet e Antioquia dhe Chocó, përcjell Telegrafi.
Santana thuhet se është përgjegjës për koordinimin e vrasjeve të grupit, furnizimin me armë zjarri, aktivitetet e trafikut të drogës dhe ekipin e sigurisë.
Pamjet video të lëshuara nga autoritetet treguan momentin kur Santana po shkonte drejt altarit në një kishë në qytetin e Uramita kur agjentët e arrestuan atë të mërkurën e kaluar.
Një grua shihet në video duke pyetur oficerët e policisë pse po arrestonin dhëndrin, para se të grindeshin me agjentët ndërsa e tërhiqnin nga kisha.
Santana ishte në kërkim nga policia që nga viti 2017, por arriti të shmangte kapjen në disa raste dhe kërkoi strehim në rajonin malor Antioquia.
Me afro 3,000 përkrahës, “Klani i Gjirit” konsiderohet karteli më i fuqishëm i drogës në Kolumbi dhe grupi vepron jashtë departamenteve të Antioquia, Chocó dhe Cordoba.
Sipas raportit të Vlerësimit Kombëtar të Kërcënimeve të Drogës të Administratës së Përmbarimit të Drogës 2020, organizata kriminale kolumbiane ‘dërgon sasi shumë-tonëshe të kokainës përmes transportit detar në Panamanë e afërt dhe vendet e tjera në Amerikën Qendrore në mënyrë të rregullt’.
Në përgjithësi, organizatat kolumbiane të trafikut të drogës janë përgjegjëse për 91 për qind të kokainës që është kapur në Shtetet e Bashkuara. /Telegrafi/