Shefi financiar për një kohë të gjatë i kompanisë së Donald Trumpit është deklaruar fajtor për akuzat për mashtrim dhe evazion fiskal në një gjykatë në New York.
Allen Weisselberg, i cili shërbeu si zyrtari kryesor financiar i Organizatës Trump, ishte akuzuar për fshehjen e më shumë se 1.7 milion dollarëve të ardhurave vjetore.
Ai pritet të dënohet me pesë muaj burg dhe duhet të paguajë paratë që i detyrohet shtetit. Trump nuk është akuzuar, raporton bbc.
Ish-presidenti – i cili nuk akuzohet për keqbërje – e ka përshkruar hetimin penal të prokurorit të qarkut të Manhattanit në kompaninë e pasurive të paluajtshme të familjes si një gjueti shtrigash.
Çështja lidhet me një skemë 15-vjeçare që prokurorët thanë se ka ndihmuar drejtuesit e Organizatës Trump të shmangin pagimin e taksave për përfitimet e korporatave si qiraja, pagesat e veturave luksoze dhe tarifat e shkollave private.
Hetimi u fokusua nëse Weisselberg dhe drejtuesit e tjerë i morën këto përfitime pa i raportuar siç duhet në deklaratat e tyre tatimore.
“[Ai] vendosi të pranojë fajësinë sot për t’i dhënë fund këtij rastit dhe maktheve ligjore prej vitesh që i janë shkaktuar atij dhe familjes së tij”, tha avokati i Weisselbergut.
Ky i fundit, i cili shihet si një nga bashkëpunëtorët më besnikë të biznesit të Trumpit, ka punuar për ish-presidentin për gati 50 vjet. Ai la punën si drejtor financiar, të cilin e kishte mbajtur që nga viti 2005 kur u arrestua vitin e kaluar.
Organizata Trump është gjithashtu e pandehur në këtë rast dhe avokatët e saj janë deklaruar të pafajshëm. /Telegrafi/