Shefi i Mercedesit, Toto Wolff, u trondit nga vendimi i Lewis Hamilton për t’u larguar nga skuadra gjermane dhe për t’u transferuar te Ferrari në fund të këtij viti, por ai theksoi se nuk mban inat ndaj tij.
Hamilton nënshkroi një kontratë dyvjeçare me Mercedes në gusht të vitit të kaluar, por papritmas vendosi të transferohej te Ferrari pas vetëm një sezoni.
Siç theksoi Wolff, ai kishte dëgjuar thashetheme për largimin e Hamilton në Ferrari, por donte të dëgjonte versionin zyrtar nga britaniku.
“Ai erdhi për të pirë një kafe me mua në Oksford, më tha se kishte vendosur të transferohej te Ferrari në vitin 2025 dhe kaq”.
“Jam mësuar me surpriza në Formula 1, por kjo më befasoi vërtet. As nuk u përpoqa t’ia ndryshoja mendjen dhe nuk e fajësoj për vendimin që mori”.
“Rrugëtimi ynë profesional do të përfundojë, por ai do të mbetet miku im”, ka thënë Wolff. /Telegrafi/