Nuk është vetëm shqiptari Daniel Godelli, peshëngritës të cilit i është refuzuar viza nga Shtetet e Bashkuara për të hyrë në tokën amerikane, e për të marrë pjesë në kampionatin botëror të peshëngritjes, që do të zhvillohet në Anaheim të Kalifornisë.
Këtë radhë, ai që u refuzua është kampioni olimpik dhe rekordmeni botëror në kategorinë e peshës deri në 85 kilogramë, Kianoush Rostami.
Në këtë rast, arsyeja e mosdhënies së vizës është e ndryshme nga ajo e peshëngritësit shqiptar. Iraniani u penalizua pikërisht nga politika presidentit amerikan Donald Trump, i cili ka përcaktuar “listën e zezë” të shteteve, banorëve të të cilëve nuk iu lejohet hyrja në SHBA, ndërsa Irani është një prej tyre.
Nuk dihet nëse vendimi për këtë refuzim është përfundimtar apo jo. Ajo që dihet në këtë moment është se Rostami rrezikon vërtet të humbasë këtë botëror, transmeton Top Channel.
Vet peshëngritësi ngriti zërin për mohimin e kësaj të drejte, madje ai u shfaq tej mase i zemëruar për refuzimin e vizës nga SHBA.
“Kam dy milionë dollarë, jam i pasur dhe jam rekordmeni botëror”, është mësuar të ketë thënë Rostami, që shtoi se nuk dëshironte “Green Card” nga SHBA, pasi dëshira e tij është të qëndrojë në Iran.
Ndërkohë, ka ardhur edhe reagimi nga Federata amerikane e Peshëngritjes, nëpërmjet drejtuesve të saj, të cilët deklaruan se janë në kontakte me Departamentin amerikan të Shtetit për këtë çështje dhe shpresojnë që të gjithë sportistët që kanë aplikuar për vizë amerikane të kenë mundësi ta marrin atë, në mënyrë që të garojnë në këtë botëror.