Shtetet e Bashkuara të Amerikës (SHBA) kanë vendosur sanksione për dhjetëra individë dhe entitete të Rusisë, në mesin e të cilëve shtatë oligarkë dhe 17 zyrtarë të lartë të vendit.
Ndëshkimet paraqesin një hakmarrje për atë që cilën Washingtoni e quan si aktivitete gjithnjë e më të dëmshme të Moskës, nisur nga aneksimi i Krimesë, duke vazhduar me mbështetjen e vazhdueshme që ja jep regjimit sirian, përfshirë edhe përpjekjet e saj ‘për të shkatërruar demokracitë Perëndimore dhe aktivitetet keqbërëse kibernetike’.
Sekretari amerikan i Thesarit, Steven Mnuchin, në deklaratën ku njoftoi për masat e ndërmarra të SHBA-ve, tha se qeveria ruse vepron për një përfitim jo të barabartë të oligarkëve dhe elitave qeveritare.
“Oligarkët dhe elita ruse, të cilët përfitojnë nga ky sistem i korruptuar, nuk do të mund të fshihen për të shmangur pasojat e aktiviteteve destabilizuese të qeverisë së tyre”, tha Mnuchin.
Sanksionet e shqiptuara të premten, përfshijnë disa nga njerëzit më të pasur të Rusisë, mes tyre manjatët e energjisë, Vladimir Bogdanov dhe Oleg Deripaska. Sanksione u janë shqiptuar edhe oligarkëve Suleiman Kerimov, financues rus i afërt me presidentin Vladimir Putin, drejtorin në sektorin e naftës, Igor Rotenberg, drejtorin Ekzekutiv në sektorin e Energjisë, Kirill Shamalov, biznesmenin miliarder rus Andrei Skoch, si dhe ish dhëndrin e Putinit, Kirill Shamalov.
Përveç individëve, SHBA-të kanë vendosur sanksione edhe mbi 12 kompani ruse, të cilat drejtohen nga shtatë biznesmenë.
Për sa u përket qeveritarëve të vendosur në listën amerikane të sanksioneve ndodhen Andrey Akimov, kryetar i Gazprombank në pronësi të shtetit dhe anëtari i bordit të Gazprom Neft, Sergey Fursenko.
Sanksionet ndalojnë individët nga SHBA-të të bëjnë biznes me entitetet dhe personat e sanksionuar rusë, pasuria e të cilëve është ngrirë në SHBA. /Telegrafi/