Shtetet e Bashkuara kanë miratuar ndihmën ushtarake për Tajvanin në kuadrin e një programi që përdoret zakonisht për të ndihmuar shtetet sovrane në një lëvizje që ka gjasa të zemërojë Kinën, e cila pretendon se ishulli demokratik i vetëqeverisur është territor i saj.
Sipas mediave të huaja, përcjell Telegrafi, Departamenti i Shtetit informoi Kongresin të martën për paketën prej 80 milionë dollarësh, e cila është modeste në krahasim me shitjet e fundit ushtarake në Tajvan, por shënon herën e parë që Uashingtoni i ofron ndihmë Taipeit në kuadër të programit të financimit të jashtëm ushtarak (FMF), i cili në përgjithësi përfshin grante ose kredi për vendet sovrane.
Dhe njoftimi ka të ngjarë të rrisë tensionet me Pekinin, i cili nuk e ka përjashtuar përdorimin e forcës për të marrë kontrollin e Tajvanit.
SHBA dhe Kina kanë pasur marrëdhënie diplomatike zyrtare për 50 vjet, por Uashingtoni mbetet mbështetësi më i madh i Tajvanit.
Legjislacioni kërkon gjithashtu që ai të furnizojë ishullin me armët e nevojshme për mbrojtjen e tij, por këto zakonisht janë bërë mbi baza tregtare dhe jo si ndihmë direkte.
Departamenti i Shtetit këmbënguli se ndihma e parë nën FMF nuk nënkuptonte ndonjë njohje të sovranitetit të Tajvanit.
“… Shtetet e Bashkuara kanë një interes të qëndrueshëm për paqen dhe stabilitetin në ngushticën e Tajvanit, e cila është kritike për sigurinë dhe prosperitetin rajonal dhe global”. /Telegrafi/